عبدالله الغانم والشيخ مسلم أبوثنين والشاعر حسن بن بطحيه يحييون ليالي الشعر النجدية
قصيدة عبدالله بن خالد الغانم الوداعين ومجاراة الشيخ مسلم الأزمع أبوثنين والشاعر حسن بن بطحيه الوداعين:
يالطلايب لقيتي لك قبيل
اجمعي حيلتك واستعجلي
ون عجزتي.. يدٍ تحت الشليل
مع يدٍ فوقها عل تنطلي
حقدك اللي ترك عقلك خِـبِـيل
يجبرك ما تعي يا مبتلي
قَـنْـبَـعوها حكي يوم الفعيل
والرجل بالحكي ما يعتلي
إتبعَ الحقِّ حكمك لا يميل
يحتذي حذوك الما ويرتوي
جدي اللي ترك بُرجٍ طويل
غانم اللي كفى وِلْـدَ الـبْـعَـلـي
فعلنا ما يطوله يالبخيل
حاسدٍ همِّ جيبه يمتلي
نحرقَ المالِ مسمارٍ وهيل
ضيفنا عندنا ما ينبلي
لادِ ودعانِ نخزي من يعيل
يـومِ وَسْـمِ العصا محدٍ بِـلِـيْ
عبدالله بن خالد الغانم
__________
شاعرن صغت قاف مستحيل
والهواجس خيول تصهلي
معتلي بالشعر قمة سهيل
مركزك بالطليع الاولي
لامنافس ولاند ومثيل
بالثريا لك اعلى منزلي
دامكم للعرب نور ودليل
ماعليك برداه ولاعلي
من يبي بالرداء شب الفتيل
نودعه وسط نارن تصطلي
يانسل من حماها بالصقيل
في الوغاء يوم ناره تشعلي
غانم الي ليا هاب الذليل
منهو اللي لفعله يجهلي
جدك الي نقل حملن ثقيل
والميادين نيرانٍ تنغلي
مجدكم عز جيلن بعد جيل
علم الي جهلكم يسالي
لا تفكر بما قال الهبيل
القزم للهرم مايوصلي
مسلم الازمع ابوثنين
________________
أركبَ الـشِّـعرِ واصهلها صهيل
صوتِ حرفي يطوفَ البُـحْـتري
يصمخَ اللي ليا حاول يعيل
يطحنَ ضلوعِ صدره مرتكي
مِسْـنِـدٍ يا السبيعي ما يميل
مِحْزمٍ من عرفته ممتلي
صهوتي مجدِ ساطع مستطيل
وفْـرِسي فعلِ حاضر يعرضي
اطمرَ الوغدِ لا فكَّر يحيل
كودِ يلقى سنامه مِـنْـوطي
ابيض الوجهِ بوثنينَ الأصيل
وقفتك يا مسلم تشهدي
عبدالله بن خالد الغانم
_____________________
اقدح الزند في راس الفتيل
والمعاني فالثريا تعتلي
شاعر لي مع الشعار قيل
ادحم الصف كله ما علي
والشوارد لها عندي مقيل
جوهريات الزمرد والحلي
مرحبا ياقاف شعر مستحيل
بين ابن عمي وجاراه الشلي
الفرايد تهلكه والهيض نيل
من مزيرعها لحد العبدلي
بين رواد الثمينه والجزيل
سقت لاجل الغاليه ركب جملي
واصدق التعبير في بطن الحصيل
يبلغ المضمون واسمع مايلي
الفتى له طلعة كنها سهيل
ماهي بكرمة قعود ولا طلي
واصل المشوار يالحر الاصيل
خل عدوان الصداره تصطلي
وانت ماتحتاج لك دعم ودليل
ذو شطير بالمعرفه ممتلي
ذي مجاراتي عسى عمرك طويل
صايبات من غزير المنهلي
حسن بن بطحيه ال سويلم الوداعين
_________________
أصقلَ الحرفِ .. للبيت الصقيل
يِـصْـوِبَ الرِّمْحِ .. لا مِنَّه معي
هيضة الشِّـعرِ .. كِـنْـها هدمِ سيل
يَـجرفَ الْبَيْتِ .. سيلي وقلمي
يا حسن طيبِ .. علمك ضوّ ليل
يهديَ الكــلِّ .. لرياض النبي
أنطحَ القَـرْمِ .. وأتوطّى سهيل
تعجز الأَرْضِ .. تنجب ندّ لي
أكسر النفسِّ .. مع ربي ذليل
واتبع العارفِ .. اليا جاد لي
وانت يا نهرِ .. معرفةٍ طويل
أنهلك دامِ .. علمك ينفعي
مالنا مالِ .. قزمٍ مستطيل
كسوةَ العـزِّ .. هي ما نكتسي
عبدالله بن خالد الغانم
