رسالة إلى كل كويتي شريف
تتجاهل وطنك ..
وأنت لديك القدرة على مساعدته
أليست تلك خيانة ؟
إلى كل كويتي حُر شريف ..
ليش نوقف مكتفين أيدينا أمام كم الفساد اللي غرقونا فيه ؟
ليش نقبل إقتران صفة الفساد فينا ككويتيين
مع أنهم قلة قليلة وفئة ضالّة ولا يمثلون الشعب الكويتي الحر الشريف اللي يحب وطنه
ويضحي من أجله؟
” الكويت ليست مؤقتة ”
ليش يتعاملون معها على أنها شيء مؤقت
ينهبونها بدون رحمة ويستنزفونها حتى الموت ؟؟
ليش نصحى كل يوم على سرقة جديدة ؟
وعلى استفزاز جديد ؟
وعلى إلهاء جديد ؟
واستغفال وتمثيليات وضحك على الذقون
من مجلس وحكومة ؟
إلى متى ؟؟
نسمع ونشوف سرقات وتلاعب
وهدر للمال العام ولا نشوف مذنبين ؟
وإستجوابات مفضوحة عارفين نتيجتها ؟
تشريع قوانين لا تهم المواطن ولا يستفيد
منها الا إنها تضيّق عليه عيشته وحريته !؟
ليش نقبل أن تكون الكويت في مقدمة قوائم الفساد ؟؟
هل ننتظر حتى تصبح الكويت من الدول التي تعيش على المنح والعطايا والهبات من الدول الصديقة والمجاورة ؟
وشنو اللي يجبرنا ..
على السكوت عن الفساد والفاسدين ؟
وعن تناحر نوابنا داخل المجلس بدون محاسبتهم ؟
حكومة متخبطة ودايماً مستاءة !!
ومجلس أعضاءه نسوا دورهم الأساسي
يتناحرون لتصفية حساباتهم الشخصية وعداواتهم
بعنصرية مقيتة !!
ولا همّهم حال الشعب اللي من سيء إلى أسوأ !
عزيزي النائب :
لما تقول هناك فساد وفاسدين
وسراق للمال العام ولم تكشف عنهم ..
احنا كـ مواطنين أمام خيارين :
إما إنك متواطئ معاهم وشريك بالفساد
أو إنك شخص ضعيف لست أهل للثقة
اللي حمّلك إياها المواطن !
بالأخير ..
كل اللي نحتاجه ” نزاهة ” و ” القوي الأمين ”
قبل مكافحة الفساد فقط لا غير.
أما عن مكافحة الفساد فهي تحتاج إرادة جادة وقوية
بمعنى ..
لما نسمع وزير .. ونشوف نائب بـ يكافح الفساد
ولا نشوف آلية واضحة ولا يكشفون عن فاسد
فالكلام مجرد إبرة بنج لتخدير المواطن !
ودمتم ..
**
المحامية/ لولوة أحمد الظفيري – كاتبة في صحيفة الإرادة الإلكترونية
Twitter: @LawyerLoulwa
